Rreth nesh

Fondi i Sigurimit të Detyrueshëm të Kujdesit Shëndetësor eshtë institucion publik i sigurimit shëndetësor me statusin e personit juridik me të drejta, obligime, përgjegjësi dhe autorizime të veçanta për zbatim të këtij ligji në emër të siguruarve përfshirë mbledhjen efektive të mjeteve financiare për ofrimin e shërbimeve të kujdesit shëndetësor nga institucionet shëndetësore në të gjitha format e pronësisë;

Detyrat e Fondit

• Zbaton politikat e sigurimit shëndetësor, të përcaktuara nga Ministria përgjegjëse për shëndetësi;

• Siguron zbatimin e këtij Ligji;
• Propozon nivelin ose shumat e kontributeve për tu paguar, bashkë-pagesat, pagesat shtesë, dhe mjetet e tjera financiare për sigurimin e detyrueshëm të kujdesit shëndetësor në bazë të vlerësimit të situatës së të hyrave dhe shpenzimeve, gjatë një periudhe afatmesme për miratim në Bordin drejtues;
• Siguron qëndrueshmërinë afatgjatë të sigurimit të detyrueshëm të kujdesit shëndetësor, përmes parashikimit të ndryshimeve demografike, evoluimit të nevojave të kujdesit shëndetësor, përparimeve në teknologjinë mjekësore dhe zhvillimeve të kostove për ofrimin e kujdesit shëndetësor.
• Përcakton dhe operon një kornizë gjithëpërfshirëse të menaxhimit të rrezikut dhe një sistem kontrolli të brendshëm.
• Mbikëqyr pajtueshmërinë me këtë ligji nga të gjithë personat fizik dhe juridik, që i nënshtrohen atij, me anë të informimit të inspektoratit shëndetësor të Ministrisë përgjegjëse për shëndetësinë dhe thirrjes për veprim në rast dyshimi.
• Siguron grumbullimin në kohë të kontributeve të pagueshme dhe transfereve dhe mjeteve tjera financiare për sigurimin e detyrueshëm të kujdesit shëndetësor, në pajtim me këtë ligj;
• Përcakton kushtet e kontratës me institucionet shëndetësore dhe barnatoret për shërbimet dhe produktet e pakos së përfitimit, përfshirë sigurinë, cilësinë, efektivitetin e kostos, dokumentacionin dhe standardet procedurale që duhet të përmbushen;
• Negocion dhe kontrakton shërbimet e kujdesit shëndetësor, përfshirë kriteret e cilësisë dhe treguesit e performancës për matjen e outputeve, rezultateve dhe performancës së dokumentacionit mjekësor të institucioneve të kujdesit shëndetësor, duke përfshirë stimujt për arritjen e objektivave të përcaktuara.
• Me mbështetje të Komisionit teknik në Ministri të Shëndetësisë, institucioneve kompetente dhe ekspertëve, fondi shqyrton e përshtat pakon e përfitimit.
• Siguron pagesë efektive dhe me kohë të shërbimeve të kujdesit shëndetësor të ofruara nga institucionet e kujdesit shëndetësor, bazuar në kontrata;
• Në bashkëpunim me Komisionin teknik përgjegjës në Ministri të Shëndetësisë, shqyrton dhe propozon pakon e përfitimit të mbuluar nga Fondi te Bordi drejtues duke përfshirë vlerësimin e kostove;
• Mbikëqyr zbatimin e kontratave të lidhura nga Fondi dhe raporton te Bordi drejtues.
• Organizon dhe zbaton sistemin e informimit për sigurim shëndetësor të Fondit, dhe siguron ndërveprimin me sistemin e informimit shëndetësor dhe me sistemet tjera relevante të informimit të Qeverisë;
• Siguron informata për publikun për detajet e pakos së përfitimeve në versionin zyrtar përfshirë pasqyrat vjetore financiare, në faqet zyrtare të Fondit, Ministrisë së Shëndetësisë dhe në portalin e Kosova.
• Kërkon analizë aktuariale dhe auditim financiar të institucioneve shëndetësore që janë në marrëdhënie kontraktuale me Fondin.
• Mbron interesat e të siguruarit; zgjidh sipas kompetencës së tij kërkesat dhe ankesat për çështje të sigurimit shëndetësor;
• Regjistron dhe arkivon dosjet dhe të dhënat e sigurimeve shëndetësore në lidhje me statusin e sigurimit, kontributet dhe përdorimin e shërbimeve në pajtim me ligjin përkatës në fuqi;
• Përpilon statistika dhe harton raporte.
• Organizon trajnime profesionale dhe kërkime shkencore dhe angazhohet në bashkëpunim ndërkombëtar për sigurimet shëndetësore.
• Lidh marrëveshje të sigurimeve shëndetësore në nivel kombëtar apo ndërkombëtar, të cilat janë subjekt i miratimit nga Ministria përgjegjëse për shëndetësi, sipas legjislacionit në fuqi.
• Zbaton vendimet dhe rekomandimet e propozuara nga Komisionet e ankesave të Fondit.
• Ushtron të drejtën e tij për kthim të mjeteve, merr masa dhe inicion padi me qëllim për rikuperimin e dëmeve financiare ose për shqiptimin e sanksioneve në pajtim me nenet 33 dhe 34 të këtij ligji.
• Rregullon çështjet e tjera që kanë të bëjnë me sigurimin e detyrueshëm shëndetësor, në pajtim me aktet ligjore në fuqi.

• Mbikëqyrja

  Mbikëqyrjen e performancës së Fondit e bën Qeveria, përmes Ministrit përgjegjës për shëndetësi.